ദമ്മാം: മനുഷ്യപ്രയാണത്തില്‍ ചന്തയുടെയും ചിന്തയുടെയും രണ്ടു വഴികളാണുള്ളത്, ഒരു കമ്പോളത്തിന്റെയും മറ്റൊരു ധിഷണയുടെയും. ചിന്തയുടെ ഇന്ധനമാണ് വായന. ചന്തയുടെ വഴി തെരെഞ്ഞെടുക്കുന്നവര്‍ ഒരുപക്ഷെ ധനികരായേക്കാം എന്ന സാധ്യതയാണ് നിലനില്ക്കുന്നതെങ്കില്‍ ചിന്തയുടെ വഴി പുല്‍കുന്നവര്‍ ധന്യരാകുമെന്നതു തീര്‍ച്ചയാണ്. എവിടെ വായന ഇല്ലാതാകുന്നുവോ അവിടെ ചിന്ത മരവിക്കുകയും സമൂഹം അധപതിക്കുകയും ചെയ്യും എസ് എസ് എഫ് മുന്‍ സംസ്ഥാന ജനറല്‍ സെക്രട്ടറിയും ആര്‍ എസ് സി ഗള്‍ഫ് കോ-ഓര്‍ഡിനേറ്ററുമായ ആര്‍ പി ഹുസൈന്‍ അഭിപ്രായപ്പെട്ടു.
'വായിക്കുക; നിവര്‍ന്നുനില്‍്ക്കാന്‍' എന്ന പ്രമേയത്തില്‍ രിസാല പ്രചാരണ കാമ്പയിന്റെ നാഷണല്‍ തല ഉദ്ഘാടനം നിര്‍വ്വഹിച്ചു സംസാരിക്കുകയായിരുന്നു അദ്ദേഹം. ഉള്‍ക്കനമുള്ള രചനകളാണ് കാലത്തെപോലും നക്ഷത്ര പ്രഭയുള്ളതാകുന്നത്. അക്ഷരമെന്നാല്‍ നാശമില്ലാത്തത് എന്നാണ്. മറ്റൊരു മാധ്യമത്തിലും വായനയെ ഇല്ലാതാക്കാന്‍ കഴിയില്ല. സാങ്കേതിക വിദ്യയുടെ നല്ല വശങ്ങളില്‍ നിന്നും മുഖം തിരിക്കാതെ നല്ലതും ചീത്തയും വേര്‍തിരിച്ചറിയുവാനും നല്ല വായനയിലൂടെ നമ്മുടെ സാംസ്‌കാരിക പൈതൃകത്തിന്റെ ശരിയായ അനന്തരവകാശികളാകുവാനുള്ള ശ്രമമാണ് നടത്തേണ്ടതെന്നും അദ്ദേഹം പറഞ്ഞു. പരന്ന വായന മനുഷ്യനില്‍ ധന്യത പ്രസരിപ്പിക്കുന്നതോടൊപ്പം വിനയാന്വിതവും സാംസ്‌കാരിക സമ്പന്നന്നമാവും .വായനാവൈവിധ്യം നഷ്ടപ്പെടാതെ അതിന്റെ പരിമളം പരത്താനുള്ള സോദ്ദേശ്യ ശ്രമങ്ങളാണ് കാലഘട്ടം നമ്മോട് ആവശ്യപ്പെടുന്നത്. എന്തിനു വായിക്കണം എന്തു വായിക്കണം എന്നിത്യാദി ചോദ്യങ്ങള്‍ക്ക് കൃത്യമായ മറുപടി കണ്ടെത്തി കേവലം അതിനുമപ്പുറം തിരിച്ചറിവിലേക്ക് നയിക്കുന്ന വായനകളാണ് കാലാതീതമായി നിലനില്ക്കുകയെന്ന് ആദ്ദേഹം ഒര്‍മ്മപ്പെടുത്തി.
കാമ്പയിന്റെ ഭാഗമായി റിയാദ്, ജിദ്ദ, ദമ്മാം എന്നിവടങ്ങളില്‍ സെമിനാര്‍, സോണ്‍ തലങ്ങളില്‍ ഓപ്പണ്‍ ഫോറങ്ങളും സംടിപ്പിക്കും. എസ് എസ് എഫ് സ്ഥാപക ദിനമായ ഏപ്രില്‍ 29ന് രിസാല ദിനമായി ആചരിക്കും. പ്രചാരണത്തിന് സമാപനം കുറിച്ചുകൊണ്ട് മെയ് 27ന് ദേശീയ സമ്മേളനം സംഘടിപ്പിക്കും. ആര്‍ എസ് സി ദമ്മാം സോണ്‍ ചെയര്‍മാന്‍ മഹ്മൂദ് സഖാഫി അധ്യക്ഷത വഹിച്ചു. ആര്‍ എസ് സി നാഷണല്‍ കണ്‍വീനര്‍ കാസിം പേരാമ്പ്ര, ഐ സി എഫ് ദമ്മാം ജനറല്‍ സെക്രട്ടറി അന്‍വര്‍ കളറോട്, ഹാശിം (സിറ്റിഫ്‌ളവര്‍), ഉമര്‍സഅദി, ഇഖ്ബാല്‍ വെളിയങ്കോട്, സലീം പാലച്ചിറ പ്രസംഗിച്ചു. രിസാല സൗദി കോര്‍ഡിനേറ്റര്‍ ലുഖ്മാന്‍ വിളത്തൂര്‍ സ്വാഗതവും കണ്‍വീനര്‍ അബ്ദുല്ല വിളയില്‍ നന്ദിയും പറഞ്ഞു
